Со нов закон ќе се запленува имотот над 30 илјади евра без докажано потекло, најави Николовски

Вицепремиерот за борба против корупција Љупчо Николовски кажа дека драфт верзијата на новиот Закон за потекло на имот е готова и со него се предвидува конфискација на имот над 30 илјади евра од претходната година ако сопствениците не можат да го докажат неговото потекло.

Законот, како што кажа Николовски, ќе важи за сите граѓани, не само за функционерите.

„Овој закон преку граѓанска постапка за конфискација, која ја воведуваме, ќе важи за сите лица кои нема да можат во одреден законски период да го докажат потеклото на имотот. Значи ќе важи за сите лица, не само за функционерите. Постапката ќе биде граѓанска, брза, а не кривична и ќе има соодветен праг кој моментално во драфт верзијата е 30 илјади евра“, рече Николовски во обраќањето на конференцијата за детектирање и намалување на сивата економија, организирана од УНДП и Министерството за финансии.

Николовски додаде дека драфт верзијата на законот ќе биде испратена до Венецијанската комисија.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk