Владата го повлече законот за дивоградби, ќе изработи нов со прифатени забелешки на јавноста

Владата на денешната седница донесе одлука за повлекување на Законот за утврдување правен статус на бесправно изградени објекти, кој се наоѓа во собраниска процедура.

„Во известувањето, кое го прифати Владата беше изнесено дека во изминатиот период ресорното министерство организираше работни средби со претставници на комори и асоцијации од областа на градежништвото, урбанизмот, претставници на граѓанскиот сектор и учествуваше во јавни дебати организирани од страна на останати субјекти, на кои беа дадени забелешки за одредени законски решенија и предлози и сугестии за нивно доуредување“, соопшти Владата.

Министерството за транспорт и врски ќе изработи нов Предлог-закон за утврдување на правен статус на бесправно изградени објекти, согласно дадените забелешки.

 Спорниот закон за дивоградби беше изгласан во Собранието по скратена постапка на 11 мај, но претседателот одби да го потпише и го врати во собраниска процедура.

(С.Н.)

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk