Сликањето е лековито и ми ја исполнува душата, вели самоуката сликарка Живка Величковска

Процесот на сликање и творење е лековито и ми ја исполнува душата. Уживам кога ќе застанам пред завршена слика и самата ќе се изненадам дека јас тоа сум го создала“, вели самоуката сликарка Живка Величковска, која вчера ја имаше првата самостојна изложба во Куманово.

Публиката имаше можност да види 40-тина слики, создадени во последните пет години. 

Живка започнала да слика по пензионирањето во 2019 година, како начин за самоизразување, а паралелно работела на изработка на разни украсни предмети од глина, гипс, хартија, работи и во декупаж техника, како и рециклирање на парчиња мебел или покуќнина. Таа вели дека има материјал за уште најмалку две самостојни изложби- едната за презенатција на апстракција, втората за предмети од применета уметност.

Тема на нејзината изложба, насловена едноставно „Живе“ беше цвеќето, мотив кој и досега го користела, најмногу во декорација на торти. Уметничкото изразување за неа не е страно, тлеело во неа со години, иако во животот за професионална определба ја избрала економијата.

„Јас раснев и се образував во едно друго време, кога егзистенцијата беше императив за постарите, родителите, посебно за женско дете. Така и ме запишаа во средно економско училиште, со тоа би можела да бидам чиновник „кога ќе пораснам“. По инерција се запишав и на Економскиот факултет, иако желба ми беа политички или правни науки. Никогаш не сум помислила да се школувам на уметничка академија, и покрај талентот што го имав“, се потсетува Живка.

Како вработена сопруга и мајка, времето го исполнувала со домашни обрски, но како раснеле нејзините ќерки, почнала да наоѓа време за себе. Се обидела и со шиење, разни рачни работи, се занимавала и со козметичка дејност, но најмногу се истакнала во правењето на торти, кои биле мали ремек дела.

Сега, конечно донела одлука да го стави срцето над парите, и да се посвети на нешто што ја исполнува душата. Сликањето за неа е лековито, и ја исполнува душата и ѝ причинува неизмерно задоволство. Со сопствен пример сакала да ги инспирира сопствените деца, но и нејзини блиски роднини и пријатели, да бидат духовно а не само материјално задоволни. 

 Живка докажува дека возраста ниту образованието не се важни, и смета дека секој може да се изрази креативно- со сликање, рачна работа, пишување, пеење, само доколку сака и има талент.  

Во разговорот го спомна татко и Панчо, од кога смета дека го наследила талентот. Тој нејзе и на помалата сестра им правел играчки од глина, кои ги печел и глазирал во „Циглана“, каде бил вработен. Ја научил да црта и слика, а во слободно време многу се занимавал со садење, одгледување, па и продажба на саксиски цвеќиња и растенија за во градина.

Смета дека ќерка и Магда, која дипломирала на графичка уметност и графички дизајн, ја инспирирала со она што го создавала низ годините, но никогаш не ја насочувала кога требала да го избера своето занимање. Секако дека е неизмерно горда што и го пренела генот и талентот за уметност, но среќна е што од ќерките Анита и Магда, и од внуката Бела има неизмерна поддршка и неисцрпна инспирација и воља за работа.

Живка Величковска не застанува со уметничката работа,  црта и слика, и создава нови дела.  Станува и легнува со мисли и слики за она што би сакала да го искаже. Се надева на топол прием кај публиката, иако она што го работи го прави само за своја душа, за сопствено задоволство. 

 

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk