Ѓокица Лукаревски лауреат на театарскиот фестивал „Свети Јоаким Осоговски“

На доајенот на македонското глумиште Ѓокица Лукаревски вчера свечено му беше врачено признанието - Лаурет на Меѓународниот театарски фестивал „Свети Јоаким Осоговски“ , кој годинава се одржува по 13-ти пат во Крива Паланка.

Градоначалникот Борјанчо Мицевски рече дека му е чест што меѓу лауреатите на театарскиот фестивал се вклучува познатиот и омилен македенски актер Лукаревски.

Рецензентот Гоце Ристовски, театарски критичар и публицист, истакна дека Лукаревски е единствен меѓу актерите кој се издвојува по својата мултиталентираност и мултислојност во толкувањето на улогите од најразлични
жанрови и по освојувањето на сцената дури и во драмските паузи.

„Лукаревски е мајстор на импровизацијата, но и мајстор на играта на молкот и паузите, кога умее да ја исполни сцената со своето психо-физичко толкување на ролјата, нешто што му е само нему својствено“, подлече
Ристовски.

Лауреатот Лукаревски изрази огромна благодарност за доделеното признание со кое се вклучува во групата на великаните на македонското глумиште и на бившите ЈУ простори.

„Вакви зборови за моето актерско творештво досега не сум доживеал. Емоциите што ги доживеав овде за мене воедно се многу тешки, но и многу благодарни. Чест ми е што сум дел од лауреатите на овој театарски фестивал“, рече Лукаревски.

Во своето обраќање пред публиката ја изрецитира песната „На гробот на Дениција“ од Петре М. Андреевски, која ја рецетирал и на приемниот испит на Факултетот за драмски уметности пред неговиот ментор Илија Џувалековски.

Со доделувањето на лауретското признание свечено беше отворено 13- то издание на МТФ„Свети Јоаким Осоговски“.
Првата претстава што се игра вечерва е „Ѕвездено циганско кабаре“, во изведба на Уметничката работилница „Призор“ од Белград, Србија.

 

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk