Локалните патишта во Крива Паланка, Ранковце и Кратово се дочистуваат од снег

Локални земјени патишта во делови на Крива Паланка, Ранковце и Кратово се дочистуваат, а сообраќајот во државата се одвива во зимски услови, соопштуваат од Центарот за управување со кризи.

Во Општина Крива Паланка непроодни се локалните земјени патови од Дурачка река, маало Метов до селото Дренак и од месноста Компирара до селото Бс поради висина на снегот, од последните врнежи. Од селото Огут до Нерав патот е прооден само за теренски возила. Останатите патни правци, вклучувајќи го и магистралниот пат кон граничниот премин Деве Баир се проодни, а сообраќајот се одвива по влажни коловози, во зимски услови.

Сите регионални и локални патни правци на подрачјето на Општина Кратово се исчистени и редовно се опесочуваат, вклучувајќи ги и улиците во градот. Поради висина на снежна покривка од 15 до 20 сантиметри локалниот патен правец кон планинскиот дел и селата Близанци, Луково, Куново, Мушково е прооден за теренски возила со зимска опрема. Снежни навеви од снег и покривка со висина од 30 сантиметри има на патот од селото Мушково кон Нежилово и Каврак, поради што е тешко прооден за теренски возила со зимска опрема. Од јавното претпријатие надлежно за чистење и одржување на овој патен правец добиена е  информација дека наредните денови се планира чистење на истиот.

Службите на ЈП Македонија пат работат на расчистување на патиштата  на планините и повисоките места во државата, а на делови од нив е забележано подмрзнување и голомразица. На државните патни правци сообраќајот се одвива по влажно коловози, во зимски услови.

 

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk