Кошаркарите на поправен против Вардар

Кошаркарите на Куманово утре против Вардар ќе се обидат да го поправат лошиот впечаток кој го оставија против АБА Струмица. Натпреварот ќе се одигра пред празни трибини поради казната која ја доби клубот на натпреварот против МЗТ Скопје.

Амбициозниот тим на Вардар доаѓа во Куманово по својата четврта победа во сезоната. Во предходните натпревари успејаа да издвојуваат победа против Кожув, АБА Струмица и службена победа против Работнички. Дарко Радуловиќ и Владимир Георгиевски се движечката сила на Вардар, и доколку Куманово успее да го затвори овој тандем, Вардар би требало да има голем проблем во играта. Сепак, треба да се внимава на фактот дека тие играат со десет, единаесет играчи во ротација, па играчите како Ангел Тасевски, Александар Штерјов, Дарко Костески и Александар Стефановски можат да изненадат со висока реализација доколку им се остави премногу простор во играта.

Ова е битен натпревар за КК Куманово, за враќање на победничката форма и самодовербата во тимот. Кумановчани имаат одлични резултати на домашен терен, а празните трибини не би требало да влијаат негативно врз играчите. Куманово покажа дека имаат одлични индивидуалци, па поголемата ротација би требало да резултира со подобра тимска игра. Одбраната е клучниот момент на натпреварот против Вардар, и доколку противникот тешко го организира нападот и постигнува „тешки“ поени,  а Куманово го диктира темпото на игра, не би требало да биде доведена победата во прашање.

Натпреварот започнува во 19.00 часот во Спортската сала пред празни трибини.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk