Кожув и МЗТ Скопје на чекор до финалето

Актуелниот македонски првак МЗТ Скопје и екипата со најдобар скор во првиот дел од сезоната, гевгелиски Кожув, веќе поведоа со по 2-0 во серијата до три победи во полуфиналето на кошаркарскиот плејоф на Македонија.

Кожув го оствари првиот триумф во плејофот во историјата на клубот, совладувајќи го дома најтрофејниот клуб во Македонија, Работнички, со 79-73, во првиот меч од полуфиналето.

И македонскиот првак МЗТ Скопје е на една победа до финале откако убедливо го победи дома Фени Индустри со 101-84.

Во фантастична и спортска атмосфера, во преполна сала и во три четвртини израмнет дуел, гевгеличани со одлична игра во првите минути од последниот период го најавија првиот триумф во плејофот.

По три четвртини натпреварот беше израмнет, а победата за избраниците на тренерот Марјан Србиновски дојде по серијата од 11-0 во првите две и пол минути во последниот период.

Во натпреварот што се одигра пред празни трибини во салата „Борис Трајковски“ поради казната на МЗТ Скопје, „штрковите“ рутинирано го совладаа Фени Индустри со 101-84 за водство од 2-0.

Дамјан Стојановски беше најефикасен на мечот со 25 поени, на кои додаде и пет скока и шест асистенции, а кај Фени најефикасен со 19 поени беше Џејмс Камп.

Третите дуели од двете серии се играат утре на терените на Работнички и на Фени Индустри, а евентуалните четврти натпревари ќе се играат во Гевгелија кај Кожув, односно во Скопје кај МЗТ, викендов.

Во досегашните плејоф-дуели во македонскиот шампионат ниту една екипа нема победено во серијата по негатива од 0-2.   

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk