Кумановските падобранци најдобри

На Меѓународниот падобрански куп што го организираше аеро клубот „Доне Божинов„ Куманово во екипна конкуренција, прво место освои „Кватро„ од Куманово, втора беше екипата на Ниш од Србија, а трета репрезентацијата на Црна Гора.

Во поединачна конкуренција, најголем  број бодови освои Љубиша Младеновски од Куманово, потоа Александар Цветковиќ од Смедерево и Драган Ќурчиќ од Ниш.Победниците добија пехари и медали. Купот се одржа на спортскиот аеродром Аџитепе, во две дисциплина: скок на цел и скок од 4000 метри, а се натпреваруваа 7 екипи со 30 падобранци од Македонија, Црна Гора и Србија.

- Организиравме натпревар од меѓународен карактер и се надеваме дека ќе стане традиционален, помасовен. Очекуваме од идната година да влеземе во програмата на Воздухопловната федерација, бидејќи учесниците се презадоволни од натпреварувањето. За првпат во Македонија е направен тандем скок и скок од 4300 метри што е вистинско задоволство за нас како организатори- рече Љупчо Стаменковски, претседател на аеро-клубот „Доне Божинов„.

Тандем скокот го изведе српскиот падобранец Александар Цветковиќ од Смедерево со манекенката Рената Стоилковска од Скопје.

Од клубот интензиовно работат на актуелизирање на овој спорт во Македонија и се надеваат на подрѓка од надлежните државни и локални институции, бидејќи на просторот на поранешна Југославија, аеро-клубот „Доне Божинов„ добиваше престижни награди и признанија.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk