Мирковски ги загуби сите натпревари како и Ѓорѓиевски, дали следува промена на тренерската позиција?

Кошаркарите на Куманово загубија на вчерашниот натпревар против Пелистер со резултат 60-79, со што го забележаа 13.пораз оваа сезона во домашното првенство.

Тренерската смена не донесе резултат како што се очекуваше па во овој момент тренерот Владимир Мирковски ги загуби сите натпревари, од истите противници како и Игор Ѓорѓиевски додека беше тренер на клубот. Неофицијално отказот на Ѓорѓиевски му бил соопштен пред почетокот на натпреварот со Кожув, па единствено оваа сезона недостасуваше и Ѓорѓиевски да не се појави на тој натпревар. 

Трите победи на Мирковски се против втората екипа на МЗТ Скопје и Феникс 2010 во кои настапуваат играчи од младинските погони и Ангели против кого Куманово победи и во првиот натпревар. Сепак, Феникс постигна одлични резултати и додатно ангажираше странци со кои ја напаѓа Супер-лигата и сега имаат 9 победи. Ангели се дигнаа од дното и со ангажманот на Боби Митев, помошниот тренер на Берлинска Алба, Банвит, Монако и Партизан Белград, даваат јасна порака дека нема да бидат лесен плен во борбата за опстанок.

Веројатно проблемот треба да го бараме и во селекцијата на кошаркари за оваа сезона која не даде никаков резултат. Американските интернационалци беа често менувани, а спас се побара со ангажирање на минатогодишните кошаркари, меѓутоа резултатот во двата случаи изостана. Финансиските проблеми кои ги имаше клубот и честите повреди влијаат во фаќањето на ритам на тимот. 

Од најавите за борба на четири фронта, клубот веднаш испадна од Евро-натпреварите, беше исфрлен и суспендиран од регионалното натпрварување, не се квалификува за Купот и во домашното првенство се бори да го избегне дното на табелата. 

Следниот натпревар Куманово го игра против Кожув на гостински терен.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk