Зачленете се во нашиот клуб на читатели и најновите текстови ќе ги добивате на вашата мејл адреса
На традиционалната улична трка, која се одржа денеска во центарот на градот, учествуваа близу 550 ученици од сите основни и средни училишта, а организатор е Општинскиот сојуз на училишен спорт Куманово (ОСУСК).
„Ова е најмасовна трка која ја организираше сојузот, имавме близу 550 натпреварувачи, и задоволни сме од одѕивот што го имавме кај нашите ученици“, истакна Марјан Нојковски, претседател на ОСУСК.
Со овој настан започнаа манифестациите и настаните со кои се одбележува 80- годишнината од ослободувањето на Куманово.
За основците се трчаше за секое одделение посебно, од второ до девето, во машка и женска категорија, па најбројните натпреварувачи имаа и најмногу победници- 48 од нив.
Во категоријата на средношколци од 1 до 4 година во женска конкуренција победи Михаела Домазетовиќ, второ место Дора Димовска и трето место Лина Аневска, сите ученички на Гимназијата Гоце Делчев. Кај машките натпреварувачи најуспешен беше гимназијалецот Михаил Стошевски, второто место му припадна на Марио Пешевски од техничкото „Наце Буѓони“ и третото место на Немања Додевски од Регионалниот центар „Киро Бурназ“.
За најмалите натпреварувачи беа обезбедени медали и дипломи, додека средношколците добија и маица со логото на сојузот.
ОСУСК во рамките на ноемвриските денови организира и турнир во шах, на 9 ноември со почеток во 10 часот во економското „Перо Наков“ и турнирот во мал фудбал за Пехар на градоначалникот, кој ќе се игра на празничниот 11 ноември со почеток во 13 часот, во истата сала.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk