Брат ми беше чесно и мирно момче

 Се сомневам дека убиството го извршил оној што бил со него критичната вечер. Многу работи водат во тој правец.

Д.Д. од Куманово доби 30 дена притвор, под сомение дека го извршил убиството на Бојан Илиевски (31), кој во неделата исчезна од дома.

Безживотното тело на момчето било пронајдено вчера откако кумановец, завчера вечер, пријавил дека во близина на бунарот забележал траги од крв. По информацијата, полицијата излегла на лице место и го пронашла телото.

Починатото момче во пределот на десната слепоочница имало прострелна рана, најверојатно, направена од огнено оружје.

„Се сомневам дека убиството го извршил другар му, кој бил со него критичната вечер. Многу работи водат во тој правец. Брат ми беше многу чесно и мирно момче. Немал проблеми со никого, можете да прашате кого сакате“, - вели брат му Југослав, по телефон.

 Бунарот каде е пронајдено безживотното тело е длабок 15 метри, а имало 4,5 метри вода. Околината е обрасната во борова шума и грмушки, па таму често се собирале лица со сомнително однесување.

„Во неделата наутро ни кажаа дека таму има крв, но не ни помисливме дека се случило убиство. Мислевме дека е убиено некое животно, и затоа не пријавивме во полиција. Водата беше од порано загадена па ставивме табла дека не е за пиење, но доаѓаат луѓе и црпеа од неа, бидејќи ја сметаат за лековита“, - раскажуваат од црквата „Св. Мина“.

Телото на починатиот е дадено на обдукција, а истрагата треба да утврди што му предходело на убиството.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk