Ќе се сечат дрвјата покрај патот кон Пелинце

Да се исечат дрвјата и гранките покрај регионалниот пат Старо Нагоричане -  Пелинце, бидејќи го попречуваат нормалното одвивање на сообраќајот, побараа претставник на Македонија пат од Македонски шуми, на состанокот што се одржа минатата недела.

„На патот до селот Пелинце има голем број на дрвја кои се паднати покрај патот и оние кои се надвиснати над него, и секој момент можат да се скршат и да го попречат коловозот. Затоа бараме од ЈП „Македонски шуми“ да ги отстрани што побрзо додека немаме некаков проблем, - побара претставникот од Македонија- пат.

Директорот на Македонски шуми, Ваит Саити, одговори дека веќе извршиле маркирање на дрвјата, а наскоро ќе започнат со активностите.

„Дрвјата ќе ги исечевме и досега, но немаме сопствено возило со корпа бидејќи се работи за поголема височина. Деновиве ќе позајмиме од друга фирма и ќе ја завршиме работата, - рече Саити.

Претставникот од полицијата Антон Витковски, посочи дека дрвјата мора да се исечат до крајот на неделата од безбедносен аспект, бидејќи за 2 август во Меморијалниот центар Пелинце се организира прослава на АСНОМ со посета на високи делегации и голема фреквенција на возила.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk