Зачленете се во нашиот клуб на читатели и најновите текстови ќе ги добивате на вашата мејл адреса
Словенечкиот амбасадор, Бранко Раковец денеска ја посети општина Куманово при што со градоначалникот Зоран Дамјановски разговараа за реализација на заеднички проекти во повеќе области.
Покрај економска, можна е соработка на полето на екологијата и за подобрување на животот на лицата со посебни потреби.
“Ќе имаме проекти од екологијата, едуактивниот процес. Дојдовме до сознанија дека можеме да аплицираме за подобрување на условите во едукативниот процес. Можеби и за соработка во однос на децата со посебни потреби, за поддршка на дневните центри и проширување на капацитети, за продлабочување и усовршување на соработката. Ова е конкретна посета, со конкретни точки и се надевам дека ќе имаме позитивни ефекти од нашата билатерална соработка“ - изјави Дамјановски.
Амбасадорот Раковец кажа дека оваа посета е дел од серија посети низ Македонија.
“Да се овозможи размена на контакти меѓу словенечките и македонските претпријатија. Исто така стана збор за развојна соработка, обезбедување на техничка помош каде имаме неколку идеи. Се надевам дека идната година ќе реализираме конкретни проекти во оваа област. Сега е уште рано нешто конкретно да се каже, но имаме идеи и ќе видиме дали тоа може да се реализира“ - вели Раковец.
Амбасадорот потенцираше дека Куманово има добра соработка со Словенија, што се потврди и со неодамнешното потпишување на меморандум за соработка меѓу Куманово и Марибор.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk