Дамјановски на информативен разговор во полицијата

Градоначалникот Зоран Дамјановски и претседателот на Советот на општина Куманово Максим Димитриевски, попладнево биле повикани во полициска станица, откако во општинско возило кое го управувал партиски активист бил пронајден партиски матерјал.

  Едно лице од помошниот персонал го зеде возилото да го однесе во пералница, бидејќи беше излепено со самолепливи плакати. На 200 метри од зградата на Комитет било сопрено од полицијата и извршен е претрес, при што е пронајден и одземен само документ со препораки за работа на месните штабови и како да постапуваат посматрачите на изборите, согласно законот. Возилото и возачот биле упатени во полициската станица. Бидејќи возилото е под моја одговорност јас бев повикан на информативен разговор. Дадов изјава за документот што беше најден во возилото. Без налог беше извршен претрес на возилото иако во него немаше никаков пропаганден матерјал, - изјави градоначалникот Зоран Дамјановски, откако излезе од Полициската станица.

Началникот на СВР Куманово во телефонскиот разговор изјави дека не се работи за приведување на функционерите, туку за рутинска контрола на службено возило на Општината, кое го возело лице кое немало службен налог за управување, а не било ни вработено во општината .

Наспроти ова претседтелот на Советот Димитриевски тврди дека тој бил физички нападнат и приведен од полициските службеници на распит, за да потоа биде пуштен од станицата без никакво објаснување.

  Проверката на возилото се случила околу 18 часот во центарот на градот, по што членови на партијата се собраа пред полициската станица и протестираа Дамјановски и Димитриевски да бидат пуштени. Околу 19 часот тие излегоа од станицата, по што партиските активисти си заминаа.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk