Два големи шумски пожари во липковско

Два големи пожари беснеат во реонот на планината Карадак во липковските села Белановце, Отља и Стрима.

Според директорот на ЈП „Македонски шуми“-подружница Куманово Саит Ваити, гори голема површина на шума, сува трева и грмушки во пограничниот реон со Косово и Србија. Едниот пожар избувнал завчера вечер, а вториот вчера околу пладне. Не се изгаснати ниту ставени под контрола затоа што се зафатени непристапни планински терени.

 „Не може да се интервенира со возила на противпожарна единица, туку само рачно. Вчера во Белановце беа 40 вработени, гасневме со напртњачи и лопати, но тешко оди. Гаснењето ќе го продолжиме од сабајле, но екипите мора да се поделат на двата пожари. Ако не добиеме засилување тешко ќе се справиме сами, - вели директорот Саити.

Тој објаснува дека пожарот во Белановце се проширил од територијата на Србија и Косово, додека во Отља и Стрима се сомнева дека намерно е подметнат. Случајот е пријавен во полицијата и ЦУК, и се очекува денеска да се преземат потребните мерки. Пожарот во Стрима има опасност да се прошири кон куќите.

Пожарите можат да видат со голо око од Куманово, а голем облак на црн чад се издига над планината. Покрај во липковско голем пожар бесне и на Скопска црна гора на границата со кумановско.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk