Едно прваче во школото во Клечовце

 Во ОУ “Вера Которка“ во село Клечовце годинава во прво одделение се запишало само едно дете.

Како резултат на паднатиот наталитет во руралните средини секоја година се запишуваат се помалку деца, а некои од училиштата и целосно се затвораат.

Лани имавме 8, а сега само едно прваче од село Клечовце. Тоа ќе учи во комбинирана паралелка со учениците од трето одделение. Во училиштето имаме вкупно 56 ученици од 1 до 9 одделение - вели директорот Тоде Михајловски.

И ОУ “Карпош“ од село Љубодраг важи за едно од најмалите училишта на територија на Општина Куманово, но кај нив годинава има 15 првачиња.

 Лани имавме 14, а сега има 15 првачиња од три села Умин Дол, Љубодраг и Ново Село. Кај нас последниве години бројот на првачиња се движи помеѓу 10 и 20. Тие си учат во посебни паралелки - рече Владимир Јовановиќ директорот на ОУ “Карпош“.

Раководителот на секторот за образование во Општина Куманово, Миле Стојменовиќ објаснува дека Советот на Општина Куманово секоја година ја разгледува бројната состојба во училиштата, но во последниве години немало иницијатива за реорганизација на некое училиште. Тој потенцира дека ова процедура може да се направи на иницијатива на општинскиот совет, но во соработка и со согласност на ресорното министерство.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk