Гран при за „Српски вез“ на меѓународен фолклорен фестивал во Црна Гора

Културно-уметничкото друштво „Српски вез“ од Куманово ја освои највисоката награда – Гран при на 11. Меѓународен фолклорен фестивал во Бар, Црна Гора.

Кумановскиот ансамбл во изминатите осум дена беше на турнеја во Црна Гора, при што настапуваше во Бар, Будва и Сутоморе. Централен настан на турнејата беше учеството на меѓународниот фестивал во Бар, кој има натпреварувачки карактер и се смета за една од позначајните фолклорни манифестации во регионот.

„На фестивалот настапија фолклорни ансамбли од 12 држави од регионот и Европа, претставувајќи ги традицијата, обичаите и културното наследство на своите земји. Ние со изведбата на македонски и српски народни ора и игри, ја освоивме стручната комисија и публиката, освојувајќи првото место на фестивалот и Гран при наградата“, велат од „Српски вез“.

Од друштвото додаваат дека признанието претставува потврда за долгогодишната посветена работа и афирмацијата на фолклорното наследство, но и значајна промоција на Куманово и Република Македонија на меѓународната културна сцена.

 

2008 - 2026 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk