Изложба на Љубица Андреевска - Љупка во Уметничката галерија во Куманово

Во Уметничката галерија во Куманово во среда, 21 август со почеток во 20:00 часот ќе биде отворена ретроспективно-монографска изложба на Љубица Андреевска -Љупка од Кавадарци. На изложбата ќе бидат прикажани 51 уметнички дела на авторката.

Наивата, како посебен дел од уметноста е правецот во кој твори Андреевска.

„Андреевска, која е автентична во својот израз преку робусни фигури ги претставува во еден бестежински простор, давајќи значение на колоритот на бојата, претставувајќи сцени од секојдневниот живот на село. Наивата е доказ дека секој има право да се изразува уметнички и дека уметничките школи сами по себе не се гаранција за уметничка вредност, бидејќи уметноста може да се остварува и без нив“, изјави Валентина Андреиќ, виш кустос историчар на уметноста при НУ Музеј – Куманово.

Љубица Андреевска- Љупка е родена 1934 година, а со наивното сликарство започнала да се занимава во 1970 година. Пред кумановската публика порано е претставена на групна изложба во 2021 година, заедно со триесетина познати македонски уметници. Андреевска е меѓународно препознатлива со остварени повеќе самостојни и групни изложби и добиени признанија.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk