Зачленете се во нашиот клуб на читатели и најновите текстови ќе ги добивате на вашата мејл адреса
Фото клубот „Куманово“ во соработка со Центарот за култура „Трајко Прокопиев“ - Куманово, по повод Mеѓународниот ден на жената - 8 Март, по девети пат ја организира традиционалната изложба „Жените и фотографијата“.
Изложбата ќе биде отворена утре во 19.30 часот во Изложбениот салон на Центарот за култура, а ќе бидат прикажани 50 фотографии на фотографки од Македонија.
„На изложбата застапени се две теми. Ставен е акцент на жената - нејзината појава и улоги во еден организиран визуелен облик кој заслужува внимание, и слободна тема како простор за интерпретација на светот околу себе виден преку објективот на жените автори“, соопштуваат од клубот.
На фотографиите проектирани се личните доживувања на авторките, на стварноста и феноменот на секојдневието со разновидни стилски определби, но со исти цели во естетска и емотивна основа на творештвото, изразувајќи се во жанрот кој највеќе одговара со нивниот сензибилитет.
Од клубот велат постојано се зголемува бројот на жени фотографи, а тоа е еден од многуте показатели за нивна се поголема вклученост во оваа креативна дејност.
„Меѓународниот ден на жената е потсетник да го согледаме и славиме напредокот на жените низ историјата. Историја која сведочи за борба на храбри и достоинствени жени со цел обезбедување на подобра позиција на жената во сите сфери на општеството. Општество ослободено од стегите на родовата нееднаквост - општество отворено за промени и нови предизвици. Жените преку фотографијата прават вистинска револуција во осознавање на светот, која води кон рушење на поделбите, а со тоа и прифаќање на нови мислења и воспоставување на нови парадигми“, додаваат од клубот.
Изложбата ќе биде поставена до 23. март годинава.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk