Јакимовиќ: Ќе бидам градоначалник на сите граѓани во општина Старо Нагоричане

Кандидатката за градоначалник на Старо Нагоричане од ДПСМ, Елена Јакимовиќ, денеска пред жителите на општината ја претстави програмата на коалицијата на ВМРО-ДПМНЕ за престојните локални избори.

Таа вети решавање на најгорливите инфраструктурни проблеми и бепрекорно функционирање на општинските служби, преку личен пример и несебично залагање.

„Од владата на Република Македонија ќе бараме подршка за надминување на проблемот со водоснабдувањето, како најтежок проблем со кој се соочува општината. Ќе барам работа и максимална ангажираност од сите, и ветувам дека ќе воспоставам ред и беспрекорно функционирање на сите служби во општината Старо Нагоричене. Подготвена сум со лична пожртвуваност и одрекување, кога е во прашање остварување на зацртаната цел.А мојата цел и целта на мојата партија е зачувување на националниот и културниот идентитет на српската заедница во Република Македонија“, - истакна Јакимовиќ.

Таа нагласи дека ќе биде градоначалник на сите граѓани во општината Старо Нагоричане, и дека е време за нов почеток во општината и време за победа.

На централниот митинг, покрај највисокото партиско раководство на ДПСМ, присуствуваше и подршка даде и претседателот на Република Српска Милорад Додик. Тој во своето обраќање на општинскиот плоштад посака успех на кандидатката за градоначалник и листата на советници, и ги повика граѓаните да им дадат масовна подршка.

„На тој начин ќе го задржиме она што е многу важно, оваа општина да функционира како епицентар во кој ќе се собереме ние од Република Српска и Република Србија, во настојување да помогнеме и да го покажеме нашето присуство, мислам дека доаѓа време за тоа. Ова е почеток на нашата соработка, уверен сум дека една од општините во Република Српска многу брзо ќе се збратими со вашата општина и ќе имаме обострана корисна соработка. Србите мора да научат дека повеќе во историјата нема пушки и топови, туку дека најмоќно српско средство е глас. Затоа морате сите да излезете на избори и да гласате за Елена„, - порача Додик.  

На митингот зборуваше и лидерот на ДПСМ Иван Стоилковиќ, кој се заблагодари на подршката на Додик и честа што им ја укажа да дојде во општината Старо Нагоричане, нагласувајќи дека Србите од Македонија Република Српска ја сметаат за втора матица.

„Нашата девиза е секогаш свои, а никогаш сами. Секогаш бевме свои, а секогаш соработувавме со другите. Имаме пријатели и партнери меѓу Македонците, подршка од Србија, а во последно време се повеќе имаме подршка од нашите браќа од Руската федерација од партијата на Путин, а воспоставивме лично пријателство со борецот на српскиот народ, претседателот на Република Српска Милорад Додик„, -рече Стоилковиќ.

Тој потсети дека Србија одобрила 1,2 милиони евра за помош на општините во кои живејат Срби во Македонија, меѓу кои во Старо Нагоричане.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk