Кампања за безбедно возење велосипед, организира Општината, Полицијата и Вело-М

Отсекот за превенција при СВР Куманово во соработка со Општинскиот совет за безбедност во сообраќајот во Куманово и велосипедски клуб ВЕЛО-М отпочнува кампања за безбедно возење на велосипед. Промоцијата ќе се одржи утре во 11 часот со ревијално возење на велосипеди низ улиците на Куманово.

„Ќе учествуваат околу 25 велосипедисти. Акцијата се организира со цел да се зајакне свеста кај другите учесници во сообраќајот за почитување на велосипедистите како рамноправни учесници во сообраќајот, но и потсетување на велосипедистите дека треба правилно и безбедно да управуваат велосипеди во сообраќајот“, соопштува Општина Куманово.

Стартот е на булеварот „Октомвриска револуција“, а ќе заврши на Градскиот плоштад каде полициски службеници ќе вршат контрола на возачите. На велосипедистите ќе им поделат флаери и друг рекламен материјал за безбедност во сообраќајот.

(Фото.архива)

(С.Н.)

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk