“Корени“ одбележа десет години постоење

 Мултиетничкото списание “Корени“ синоќа го прослави десет годишениот јубилеј во Центарот за култура Трајко Прокопиев.

Уредникот на списанието и претседател на Здружението за наука и култура “Парадигма“, Димитар Масевски вели дека досега се издадени 42 броја, напишани 6313 страници и промовирани многу поети, културни дејци. Списанието почнало да се печати во 2002 година, за да ги смири меѓуетничките тензии веднаш по воениот конфликт од 2001 година во Македонија. Натписите се на шест јазици, кои се наведени во Уставот на Република Македонија, а воспоставена е соработка со бугарски автори.

- Нашата структура е таква што имаме текстови за сите слоеви, од општествено - политички, современи, книжевен мозаик со поезија, проза, до роднокрајниот дел каде што се поместени текстови од историјата на Куманово. Откривме многу ликови за кои кумановци не знаеја. Тука е ликот на Владимир Антонов, општински инженер кој го има изградено речиси пола Куманово, убавата градска архитектура, занаетчискиот дом, општинската зграда. Ги бараме боемите кумановски,бараме луѓе кои по нешто се издвоиле од масата. Бараме што повеќе материјал за да оставиме за идните генерации. Успехот на “Корени“ ќе се цени во некое друго време - објаснува Масевски.

Оваа година прва награда за најдобар есеј не се додели, а второ место освоија Христо Петрески од Македонија и Цонка Христова од Бугарија. Трети се авторите од БИХ, Суад Алагич и Антон Зирдун. Промотивната вечер е под покровителство на градоначалникот и Советот на Општина Куманово.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk