Зачленете се во нашиот клуб на читатели и најновите текстови ќе ги добивате на вашата мејл адреса
Бајрам Лимани од село Лојане, в.д. претседател на ДУИ Куманово, обвинет за убиството на командант Шипоња, до крајот на судењето ќе се брани од куќен притвор, откако кривичниот совет од Основниот суд Куманово му ја замени мерката притвор.
Барањето за преиначување на решението на судија во предходна постапка на мерката притвор во домашен притвор ја побарала одбраната на Лимани.
„Сметаме дека фактичката состојба е поинаква од онаа кога беше изречена мерката притвор, поради тоа поднесовме предлог за замена на мерката во куќен притвор, која кривичниот совет ја усвои, - вели адвокатот на Лимани.
Застапникот на семејството на оштетениот Реџеп Исмаили- командант Шипоња, смета дека е недопустиво да се менува мерката притвор во куќен притвор додека судењето трае, а особено кога се работи за толку тешки кривични дела.
Бајрам Лимани и Амир Љатифи, обвинети се за убиство и убиство во обид, бидејќи пред една година на 23 јули, го убиле Шипоња, а раниле уште две лица во угостителски објект во населбата Бедиње. Додека Лимани со двајца пријатели седеле во локалот, пристигнал Шипоња со уште 5 лица и започнале расправија. Подоцна се степале и извадиле оружје, при што се случила крвавата пресметка.
Второобвинетиот во случајот Љатифи останува во притвор во Шутка.
Партиски извори велат дека причина за несогласувањата на двајцата команданти била амбицијата за претседателското место на ДУИ во Куманово.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk