Кумановци протестираа против полициската бруталност

Неколку стотини кумановци попладнево протестираа против полициската бруталност и обидот , наводно, да се прикрие убиството на Мартин Нешковски од 2011 година.

Граѓаните организирани преку социјалните мрежи се собраа на Градскиот плоштад, од каде се упатија кон Полициската станица. Тие тврдат дека веруваат во веродостојноста на “бомбите“ кои ги објавува опозицијата и бараат министерката за внатрешни работи, Гордана Јанкулоска да си поднесе оставка.

“Протестираме против насилството кое се случи на петти овој месец од страна на полициските службеници врз демонстрантите. Бараме оставка од министерката Јанкулоска и од целата Влдаа предводена од ВМРО-ДПМНЕ“- изјави Љуми Бекири, граѓанин.

Повозрасните граѓани велат дека полицијата брутално се однесува, наместо да биде сервис на граѓаните. Демонстрантите се разочарани од последните случувања во земјава и од постапувањето на полицијата.

“Полицијата секаде во Македонија напаѓа. Бараме Јанкулоска веднаш да си поднесе оставка, ако не сите ќе се собреме од цела Македонија и власта ќе ја урнеме. Доста е веќе. Се што објавува Заев е точно. Монтирани, лепени, креирани разговори, па ако е така нека направи и Јанкулоска нешто, нека монтира, креира. Уште има и ќе дојде крај за некој ден сигурно“ - рече Јован Јовановски, граѓанин.

Протестот помина во мирна атмосфера и по еден час демонстрантите се разотидоа.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk