Кумановскиот музеј домаќин на прославата на Меѓународниот ден на музеите

Кумановскиот музеј утре ќе биде домаќин на прославата и советувањето „Музеите како културни средишта, иднината на традицијата“, по повод одбележување на Меѓународниот ден на музеите - 18 Мај.

На советувањето ќе присуствуваат претставници на сите музеи во државата. 

„Свеченото отварање на манифестацијата ќе биде утре во 11 часот во Занаетчискиот дом, а потоа ќе се одржи советување на кое претставници од музеите од цела Македонија, со свое излагање ќе се обидат да направат линк помеѓу минатото и иднината, со цел да се подобри работата на музеите и да се валоризира културното наследство. Музеите како архивари на нашето богато културно материјално и духовно богатство на најдобар начин ни ја претставуваат традицијата преку артефакти, експонати и видео записи како трајни културни вредности, - соопштуваат организаторите од Кумановскиот музеј.

Манифестацијата ќе ја отворат претставници од Општина Куманово и Меѓународните организации на ИКОМ и ИКОМОС, а во Меморијалниот Центар Пелинце ќе бидат доделени награди за музеј на годината, музејски проект, музејски работник и најдобар надворешен соработник.

Меѓународниот ден на музеите е прослава што во светот од 1977 година па наваму традиционално се организира на 18 мај.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk