Зачленете се во нашиот клуб на читатели и најновите текстови ќе ги добивате на вашата мејл адреса
Нема да има покачување на партиципацијата на државните факултети за додипломски, постидпломски и докторски студии, тврдат од Министерството за образование и наука, откако во дел од медиумите беше пренесена информацијата на Студентски отпор, каде се споменуваше двојно поголема сума од досегашната.
„Министерството за образование и наука реагира на натписите во дел од медиумите во кои се посочува дека на иницијатива на министерството и Владата двојно ќе се зголемува партиципацијата за студирање на државните високообразовни установи, и тоа на сите три циклуси на студии. Се работи за невистинита информација и затоа апелираме студентите да бидат спокојни, бидејќи и натаму ќе ги плаќаат истите износи за државната и за квотата со кофинансирање кои важат во моментов. Министерството за образование и наука го почитува принципот на инклузивност при креирањето на политиките и носењето на одлуките, така што ги уверуваме студентите дека ниту една одлука која го засега нивниот образовен процес нема да биде донесена без да бидат вклучени организациите кои ги застапуваат идните академски граѓани. Износите на партиципација остануваат идентични како и досега“, се вели во соопштението на МОН.
Сепак, оттаму потврдуваат дека во комуникација со Универзитетот Св. Кирил и Методиј во Скопје е добиена информација дека ректоратот побарал мислење од факултетите и единиците во состав за тоа дали износите кои во моментов се плаќаат се оправдани или можеби треба да претрпат одредени корекции. Но, тоа е интерно инициран процес на институцијата, потенцираат
надлежните.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk