Зачленете се во нашиот клуб на читатели и најновите текстови ќе ги добивате на вашата мејл адреса
Клучeн фактор за ретките болести е раната превенција, ние немаме превенција, не само за ретките, туку и за многу чести болести, ова беше пораката на стартот на шестата сезона од Националната кампања „Ги запознаваме ретките болести“.
Експертите препорачуваат до здравствените власти сите области на медицината да се ангажираат на превенција. Секако тука значајна е и едукацијата.
„Знаете, работата е во рана превенција. За жал, ние немаме превенција, не само за ретки болести, ние за многу чести болести немаме превенција. Значи, немаме рано откривање. Ако откриете рано една ретка болест, можеби не мора да ја лечите со скапа терапија. Поевтино е да се финансира во превенција отколку во лекување со скапи лекови. Мене ми е многу драго што имаме сега млади колеги овде, тоа е многу важно, бидејќи ние имаме еден генерациски јаз, потенцира проф. д-р Велибор Тасиќ.
Докторите специјалисти кажаа дека за некои болести терапијата е многу скапа, но постојат такви пациенти кои сѐ уште немаме тераписки можности.
„Тоа најмалку зависи од нас, здравствените работници, најмалку зависи од родителите. Сега, тука се финансиски процедури, законски процедури. Многу е тешко еден лек, којшто можеби го има во околината или се лекуваат само неколку деца во светот, да се донесе во Македонија. Таквите законски процедури треба да се решат, да се надминат, да се овозможи што полесно, било која терапија, која што е позната, што е веќе регистрирана во светот, да биде достапна и за македонските пациенти, истакна доц. д-р Александра Јанчевска, педијатриски ендокринолог.
Во најновата шеста сезона на националната кампања „Ги запознаваме ретките болести“ изработени се 110 текстови за ретки дијагнози во охридско-струшкиот регион, на македонски и албански јазик и ќе бидат емитувани во наредниот период.
„Месецот во февруари брои само 29 дена. Во овие први 29 дена ќе бидат емитувани и презенцирани пред јавноста нови 29 ретки дијагнози, од коишто некои се ултра ретки. На нив работеа моите ценети професори, доктори и стручни соработници. Она што особено ме радува годинава е заинтересираноста на младите доктори. Не беше воопшто лесно. До овој момент стигнавме до бројката од 110 различни ретки дијагнози и ако продолжиме со истражување верувам оваа бројка ќе биде поголема, рече Гордана Лолеска, претседател на Здружението „Ретко е да си редок“.
И годинава на стартот на кампањата во боите на ретките болести ќе светне Самуиловата тврдина, како и спомениците во централното градско подрачје и бројни институции и училишта.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk