Петковски го критикуваше градоначалникот за недоаѓањето на Денови на комедија

Советникот од ВМРО-ДПМНЕ, Драган Петковски на вчерашната седница на Советот го праша градоначалникот Зоран Дамјановски зошто не присуствувал на претставите на овогодинешниот фестивал Денови на комедија.

Петковски рече дека не е е во ред да се дели културата на позициска и опозициска, зависно од тоа кој ги организира настаните во градот.

И оваа година градоначалникот не најде за сходно да присуствува на ниту една од претставите. Која  е причината за осуството и до кога ќе ја делиме културата на позициска и опозициска? Дали со ова порачуваме и граѓаните да ја бојкотираат културата од другата политичка опција - кажа Петковски.

На ова градоначалникот Зоран Дамјановски одговори дека не е задоволен од односот на организаторите кон него како прв човек на градот и кон локалната самоуправа.

Неколку години наназад сме тотално маргинализирани. На неколку настани јас како личност бев во некомотна положба и затоа сметам дека моето присуство не е посакувано. Нашите советници, началници на сектори не добиваат карти за претстави, јас добивам покана на 2 дена пред отварањето. Во некои случаи бев маргинализиран, дури и исмеван, но тоа е персонална работа - вели Дамјановски.

Тој потенцираше дека од друга страна има одлична соработка со Музеј Куманово и Уметничката галерија и дека комуникацијата меѓу институциите  треба да се одвива во таа насока.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk