Подобрено е изнесувањето на сметот во приградските населби, сметаат советниците

Дел од советниците на вчерашната седница на Советот на Општина Куманово ја пофали работата на ЈП „Чистота и зеленило“, во однос на изнесувањето на сметот во приградските населби.

Тие тврдат дека по реакциите на надлежните преземни се мерки, со кои е подобрена хигиената во овие населени места.

„Јас како советник којшто доаѓа од приградска населба, на предходните седници укажав дека има забелешки од граѓаните во однос на редовноста на изнесувањето на сметот, заедно со колегата Сашо Стошевски реагиравме до директорката и службите. Сега морам да ги пофалам дека има напредок во однос на услугите што ги нудат на нашите граѓани. Дури се пофалени за разбирањето при собирање на кабастиот отпад, она што не е во доменот на работа на ова претпријатие“, кажа советничката Соња Тодоровска од СДСМ.

Таа смета дека подобрувањето на собирањето на сметот во приградските населби и во градот е резултат на подобрениот возен парк и реорганизација на вработените.

Со заклучокот на Тодоровска се согласија и советниците Самет Салиевски и Миле Андоновски, кои сметаат дека градот е почист во последната година, благодарение на ангажирањето на вработените, кои ја вршат најтешката работа, бидејќи граѓаните се неодговорни во однос на јавната чистота и го фрлаат ѓубрето на несоодветни места.

Директорката на ЈП „Чистота и зеленило“ Цветанка Ивановска, кажа дека со набавката на новите камиони за собирање на смет со помала запремнина, дополнително ќе се зголеми ефиксаноста на сервисирање на сметот во тесните улички во приградските населби и селата.

(С.Н.)

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk