Подрачното министерство за земјоделство ќе се сели?

Подрачната единица за земјоделство, шумарство и водостопанство ќе се пресели во нов објект, бидејќи сегашниот не ги задоволува просторните и технички услови за работа.

Ова денеска го најави заменик министерот за земјоделство, шумарство и водостопанство Ванчо Костадиновски, откако лично се увери дека осумнаест вработени ги извршуваат секојдневните обврски во две канцеларии со недоволен број на компјутери.

Забележав дека состојбата не е баш најдобра во делот на просторните услови, меѓутоа од аспект на човечкит ресурси и екипираноста е на задоволително ниво. Двете простории ќе бидат оспособени и со компјутери. Во периодот што следува се надевам дека и просторните услови ќе бидат подобрени, бидејќи се разгледуваат повеќе опции кои се на располагање за да може подрачната единица да биде во порепрезентативен објект и да биде подостоинствено во делот на движењето на земјоделците и граѓаните во просториите во кои ги остваруваат своите потреби, односно да ги добиваат услугите, - рече заменик министерот.

Подрачното министерство најверојатно ќе се пресели на првиот кат на поранешниот Дом на АРМ, кој пред неколку години е даден на користење на Министерството за земјоделство. Но досега не е направено ништо просторот да се уреди и преадаптира.

Во кумановскиот регион годишно се поднесуваат 12.300 барања за субвенционирање и исплатени се 3.5 милиони евра по тој основ.

Можам да ги пофалам колегите дека добро си ја вршат работата, бидејќи најголем дел од барањта дури 97 проценти се одобрени, додека 3 проценти се одбиени заради системски недостатоци. Директните финасиски плаќања за земјоделските култури изнесуваат околу 1,5 милион евра и 1,5 милиони евра за ситен добиток во делот на сточарството. Се надевам дека ќе го задржиме ова темпо и наредната година,-нагласи заменик-министерот.

Во подрачното министерството за земјоделство има 34 вработени, од нив 18 се во одделението за организација и координација и 16 се во Шумската полиција.  

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk