Пожарот на "Краста" значително намален, но ќе тлее уште неколку дена

Пожарот на депонијата "Краста", каде сеизнесува сметот од Куманово, е значително намален, но ќе продолжи да тлее и чади и во наредните неколку дена. 

Акцијата за затрупување на жариштето се уште е во полн ек, иако е покриено повеќе од половина од зафатеното подрачје, информираат надлежните од „Чистота и зеленило“.

„Интензивно се носи земја и се затрупува местото, локацијата на жариштето е покриена повеќе од половина. До вечерва би требало да завршиме со интервенција, но чадењето ќе продолжи уште неколку дена. Таков е природниот процес, но, за среќа многу е намалена количината на чад“, истакна директорот Ненад Стојановски.

Чадот е забележан во недела наутро, по што се алармирани надлежните служби. На терен излегла екипа на ТППЕ Куманово, полицијата и инспектор за животна средина. Направен е увид во состојбата и изработен е записник, а на претпријатието е наложено да се преземат мерки против разгорување и ширење на огнот. „Чистота и зеленило“ по сила на законот има 7 дена да ја санира состојбата на депонијата.   

Според првичните индикации огнот се појавил како последица на гасови кои се ослободуваат при разградување на сметот.

 

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk