Премиерот Заев ja посети населбата Средорек

  Премиерот Зоран Заев, во саботата по свеченоста на Спомен-костурницата ја посетил кумановската населба Средорек.

Тој вчера на Фејсбук објави дека бил во Средорек, за да се увери во големите градежни зафати кои се завршени во оваа населба.

- Повеќе од 100 години во оваа населба не била направена никаква урбанизација, ниту реконструкција. За краток рок општината обезбеди нова комунална инфраструктура која е од големо значење за жителите на населбата. Со овие проекти локалната власт во Куманово ја демонстрира грижата за секој дел, за секоја населба од својата општина и грижата за сите граѓани. Завршените работи на канализационата мрежа во Средорек, како и работата на асфалтирањето на улиците се придонес за поквалитетен живот и секојдневие на локалните жители. Во Куманово и во поширокиот регион, во полн ек е градежната офанзива на различни капитални инфраструктурни проекти,  – нагласи премиерот.

Новинарите не беа известени за посетата на владината делегација на Средорек, а јавноста за тоа дозна преку социјалните мрежи. Прв се пофали советникот во Советот на Општина Куманово, Самет Салиевски, кој во саботата напиша дека за првпат премиер на држава е во посета на Средорек.

- Голема благодарност до Зоран Заев од жителите на населбата за укажаната чест и почит кон нашата заедница. Повод, не еден, прво празникот 11 Октомври, а потоа и целосната реконструкција на инфраструктурата во населбата за што уште еднаш искажуваме голема благодарност до градоначалникот Максим Димитриевски, министерот Оливер Спасовски, пратеникот Мартин Костовски и сите кои дадоа свој придонес за да жителите на оваа населба добијат попристојни услови за живот, - напиша Салиевски.

Во изминатиот месец во населбата беше реконструирана канализациона мрежа, ставен асфалт и бекатон на неколку улици, се асфалтираше ул. „Доне Божинов“ на влезот на населбата, а беа насликани и мурали на неколку објекти каде што се одржал собирот.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk