Промоција на документарен филм за тамбурашката легенда Драгомир Шојиќ

Во Младинскиот културен центар „Козјак“ утре (среда) во 20 часот, ќе се промовира документарен филм за легендата на тамбурашката музика Драгомир Шојиќ - Шојка. Филмот е во режија на Ратомир Цениќ и Небојша Илиевски, а по сценарио на Далибор Шојиќ.

Во филмот животот и професионалниот пат на Шојиќ го раскажуваат неговите пријатели и соработници Нино Величковски, Томислав Маниќ, Радослав Шутевски-Шуте, Горан Илиќ, Јордан Плевнеш, Маргица Антевска, Митко Апостоловски и други.  Документарецот трае четириесетина минути.

Пред еден месец во Центарот за култура „Трајко Прокопиев“ се одржа изложба на фотографии  „Драгомир Шојиќ- човек оркестар“ и промоција на монографијата „Тамбурата на Шојиќ“.

Шојиќ е роден на 28 ноември 1950 година во Куманово, а почина на 21 август 2018 година.

Завршил нижо музичко училиште во Куманово и средно музичко училиште во Скопје, отсек виолина.  Професионално се занимавал со музика, свирел во повеќе кумановски групи и оркестри.

Во 1968 година е еден од оснивачите на првата рок група во Куманово „Глечери“, а потоа членувал и во поп групата „Нај, нај“. Настапувал на „Заечарска гитаријада„ и други престижни рок манифестации во земјава и странство.

Во 1986 влегува во тамбурашката музика и го формира Тамбурашкиот оркестар на Драгомир Шојиќ. Се смета за зачетник на тамбурашкото музицирање во Куманово, поради што редовно учествува на Кумановскиот тамбурашки фестивал, но и на сите останати познати тамбурашки фестивали на Балканот и пошироко. Има освоено повеќе награди и признанија.

Во 1990 година неговото свирење е опеано во легендарната песна „Свирете ми тамбури“, која е прогласена за една од 10 песни на столетието.

Драгомир Шојиќ годинава по повод 500 години Куманово, постхумно од градоначалникот доби благодарница за неговиот придонес во промоција на градот.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk