Зачленете се во нашиот клуб на читатели и најновите текстови ќе ги добивате на вашата мејл адреса
Жителите на кумановското село Режановце денеска по втор пат ја блокираа изградбата на пругата Куманово-Бељаковце, бидејќи не е исполнето барањето да се постави цевка под пругата за потребата на канализациска мрежа во селото.
Жителите бараат додека трае реконструкцијата на пругата да се остави пропуст за канализација и со тоа да се реши деценискиот проблем со отпадните води. Фирмата изведувач која по првиот протест ветила дека до петок цевката ќе биде вградена, не го исполнила ветувањето и работите сеуште не се отпочнати, па селаните се сомневаат дека ќе бидат изманипулирани.
“Срамота и греота е што ова го прави државата, а државата ја прави народот. Овдека живеат 1000 жители и некој треба да размисли со глава. Селото е незадоволно. Немаме друг начин демократски, освен да пратиме допис да не го користат нашиот пат. Државата нема слух, има за нешто во Скопје да се прави, таму има по 3 милиони евра, а за овде нема 25.000 евра толку чини да се прекопа и општина Куманово по 15 октомври да стартува да се направи канализација во селото“- вели Зоран Крстевски, претседател на месна заедница Режановце.
Жителите се жалат дека само за време на избори добиваат ветувања од политичарите, а ништо не се реализира.
“Ветуваа за три дена ќе ја постават цевката, а еве месец дена биднаа и ништо нема. Јас не знам кај да се обратиме и што да правиме. Ако треба секој ден ќе протестираме и нема до дозволиме да работат“ - рече Душко Спасовски, жител на Режановце.
Подизведувачот го посети селото и прво им кажа дека немало цевка, а потоа дека машината е во дефект и не можат да работат. Мештаните сметаат дека ова се само изговори за да не се вгради цевка под пругата.
Со истото барање жителите на Режановце протестираа пред месец дена.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk