Пуштени се термини за очни прегледи за првачињата во кумановската болница

Во тек е закажување на прегледите преку матичните лекари на дечињата, кои ќе се запишуваат во прво одделение.

Во Општа болница Куманово прегледите ќе се вршат од 1 април.

„Има посебни термини пуштени наменски, само за првачињата, прегледите се извршуваат на Одделот за офтамологија. И покрај големиот број на првачиња од Куманово, Липково и Старо Нагоричане службите успеваат да ги апсорбираат дневните термини. Не очекуваме да има било каков проблем за родителите, впрочем како и до сега“, истакна Владимир Симоновски, главен медицински техничар на болницата.

Се работи за општ, скрининг преглед за рана детекција на можни влошувања на видот. Лекарите во тој случај ги советуваат и упатуваат родителите за понатамошни третмани и мерки, за да се спречи влошување на состојбата.

При запишувањето на детето во прво одделение родителот, односно старателот е должен да  достави потврда за примените задолжителни вакцини за детето, офталмолошки и стоматолошки  преглед, издадена од надлежна здравствена установа, информираат од Секторот за образование.

Запишувањата на првачињата во општинските основни училишта започнуваат во мај.  

 

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk