Распуштени „Алфите„ во Куманово

 СВР Куманово остана без Посебната мобилна единица за борба против криминал. На полицајците во вторникот им било соопштено дека се укинува Единицата, и им биле поделени наредби за разрешување од должноста, како и за распоредување на старите работни места .

Во кумановската единица „Алфи„ имало вработено 38 полицајци, распоредени во 4 тима.

Бевме повикани на состанок, и ние мислевеме дека новиот началник сака да ги слушне проблемите со кои се соочуваме и да ни каже што очекува од нас. Наместо тоа, добивме наредби, потпишани од директорот Љупчо Тодоровски, за разрешување, без прецизно објаснување зошто. Нашата единица беше од привремен карактер, и наводно, не успеале да се изборат да добиеме решенија за работните места, како што тоа го направиле во Скопје. Спомнаа дека ќе се формира и некаква нова единица, но ништо конкретно- вели еден од полицајците.

Од МВР велат дека „Алфите„ се стационирани во Скопје, а се испраќаат по потреба и во другите градови.  

Вработените се разочарани од ваквата одлука на Дирекцијата за безбедност, поради тоа што Куманово е специфично подрачје со мешан етнички состав каде се вкрстуваат патишта на двата коридори, а ги покрива и општините Липково и Старо Нагоричане, и северната граница каде што е неопходна поголема полициска контрола. Единицата е формирана пред 6 години, а целосно била опремена и професионализирана пред 3,5 година. Дека работите не одат во добра насока, полицајците насетиле уште лани ова време, кога во почнало интензивно да се штеди на возила и гориво.

Се штеди на гориво во сите служби, но најизразено беше врз работата на мобилната единица. Ние наместо да користиме три возила во смена, користевме само едно, но и тогаш бевме лимитирани на 500 денари, што не е доволно ни за пола смена. Многу често ќе заминеме на терен и ќе останеме без гориво, па стававме сами за да се вратиме во станицата- вели нашиот извор.

Алфите во Куманово имаа резултати во работењето и подршка кај граѓаните,  бидејќи криминалот во градот значително се намали како резултат на нивното дејствување.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk