СДСМ: Власта создаде хаос во кумановското образование

 Општинската организација на СДСМ денеска ја обвини Владата дека  со своите непромислени проекти и експерименти прави хаос во образованието.

 Како пример ги  посочи преобемните наставни програми,големиот број предмети, експерименти со нови предмети, немањето учебници поради што учениците не се во состојба физички ни психички да издржат,  додека пак наставниците се под постојан притисок дека ќе ја изгубат работата.

Министерството за образование и наука и проектите кои истото ги финансира ја заобиколуваат општина Куманово поради лесно препознатливи причини. Доказ за ваквите тврдења се, на пример, недостаток од интервенции на спортските терени пред училиштата, а не пак изградба на ветените спортски сали во сите училишта во Куманово, со исклучок на салата во ОУ „Магдалена Антова“ чија градба и пуштање во употреба беа следени со бројни пречки и ограничувања од централната власт. Да ги потсетиме претставниците на Министерството за образование и за другите инфраструктурни потреби на училиштата- рече портпаролот Слаѓан Спасовски.

Според Спасовски во  општина Старо Нагоричане царува непотизмот и неквалитетот при вработувањето во образованието по роднински врски.

Состојбата е потрагична бидејќи се отпуштаат од работа вработени кои совесно си ја вршеле својата работа, но единствен недостаток им е тоа што не се блиски со гарнитурата на власт во Старо Нагоричане. Тие се заменети со кадри кои можеби исто се квалитетни, но и многу се блиски, по партиска и роднинска врска  до раководството на Општината. Дали ова не е поигрување со лични човечки несреќи и судбини?- праша Спасовски.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk