СДСM:ВМРО - ДПМНЕ насилниците ги прикажува како жртви

Општинската организација на СДСМ обвини за партизираност на МВР, по инцидентот во којшто физички бил нападнат пратеникот Максим Димитриевски од полицајци во алкохолизирана состојба.

„МВР наместо сериозно да се зафати со расветлување на случајот, недозволиво излезе со конструирани клевети кон пратеникот, без да ја слушнат неговата изјава. Не е запазена процедурата да не се излегува со предвремени информации, додека не заврши истрагата. Дополнителна потврда дека не се знае што е МВР, а што ВМРО-ДПМНЕ покажуваат прес конференциите на партијата на Груевски во заминување од власт, којашто си дозволува да коментира случај во надлежност на полицијата, - изјави портпаролот на општинското СДСМ Сашо Тодоровски.

 Тој повика МВР реално да ја утврди фактичката состојба и да поднесе соодветни пријави за луѓето кои го извршиле насилството.

„Бидејќи институциите се узурпирани од кадри на раководството на ВМРО - ДПМНЕ кои монтираат случаи со кои што насилниците ги прикажуваат како жртви, укажуваме на дека професионалците во МВР и органите на истрагата се должни реално да ја утврдат фактичката состојба и да поднесат соодветни пријави за насилството врз Максим Димитриевски и неговото семејство во Ресторан Палас – Куманово, - додаде Тодоровски.

Истовремено, побара од претседателот на ОК Куманово, Драган Петковски, јавно да се извини за, како што рече, лагите и клеветите против Максим Димитриевски кои биле изнесени на прес конференција.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk