Се реконструира и ќе се гасифицира зградата на СВР Куманово, кажа министерот Спасовски

Министерот за внатрешни работи Оливер Спасовски, по повод Меѓународниот ден на енергетска ефикасност, денеска направи увид во градежните активности на зградата на СВР Куманово. Реконструкцијата почна пред еден месец, а предвидува замена на кровната конструкција,  инсталацијата, столаријата, санитарни јазли, а ќе се постави инсталација за приклучок на гас.

„Ова е еден од најстарите објекти можеби и во најлоша состојба во државата кој што започнавме да го реконструираме и навистина работиме на една темелна и квалитетна реконструкција, особено што мораме да имаме во предвид дека еден дел од зградата е изграден во 1929 година, а во последните 50 години немаме скоро никакви реконструкции или многу мали реконструкции во овој дел. Тоа покажува дека треба навистина сериозно да се зафатиме со реконструкција и токму поради тоа сме посветени во овој период, покрај другите објекти кои што ги работиме на територијата на целата држава, да го завршиме и објектот на СВР Куманово“, изјави Спасовски, кој очекува најдоцна до први август да заврши целосната реконструкција.

Тој потсети дека за овие три и пол години, реконструирани се 54 објекти, додека во моментов се работи на реконструкција и санација на четири објекти и  тоа: Секторот за внатрешни работи Куманово, Полициската станица  Ресен и Полициските одделенија  Маврово-Ростуше и Дојран.

„Најголемиот дел од зградите кои што ги реконструираме ги реконструираме со квалитетни материјали, односно материјали кои одговараат на заштитата на животната средина и на здравјето на граѓаните, и материјали кои што нудат енергетска ефикасност. Таков е случајот и со оваа зграда денеска, впрочем се трудиме, покрај создавањето на добри услови за полициските службеници, да користиме и вакви материјали кои што ќе бидат во функција на енергетска ефикасност и заштеда на МВР, меѓутоа даваме и придонес во заштитата и на животната средина и токму затоа конкретен пример може да биде и СВР Куманово каде што започнуваме со гасификација на целиот овој објект а на тој начин допринесуваме и кон оваа цел – да ја заштитиме животната средина“, рече министерот Спасовски.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk