Зачленете се во нашиот клуб на читатели и најновите текстови ќе ги добивате на вашата мејл адреса
Селата Отља, Оризаре и Лопате во Општина Липково претрпеле најголема штета во невремето кое попладнево го зафати кумановско-липковскиот регион.
Невремето започна во 18.15 часот со интензивен пороен дожд, силен ветер и град со големина на орев.
Според првичните податоци на Центарот за управување со кризи оштетени се земјоделски култури и има штета на автомобили од паднатиот град.
Во Куманово добиена е пријава за поплавен двор во кој има трафостаница на ЕВН на улицата „11 Октомври“ број 77 зад објектот на „Живко Фурна“. Регионалниот ЦУК Куманово го известило ЕВН за да се преземат безбедносни, интервентни мерки од нивна страна.
Во Младо Нагоричане - Општина Старо Нагоричане, пријавивено е дека од обилните врнежи на дожд и град уништени се 300 родни дрвца и оштетен му е кров на викенд куќа.
ЦУК предупредува дека, според УХМР се очекува зголемување на водостојот на дел од реките. Конкретно, заради обилни врнежи од дожд во Косово, таму е зголемено нивото на реката Лепенец. Во текот на вечерните и ноќните часови се очекува да има зголемување на водостојот на реките и во нашата земја.
Пороен дожд и грмежи, локално во форма на невреме ќе има и утре, особено во источните делови. Потоа во следните два дена ќе преовладува стабилно време.
За време на викендов се очекуваат нови врнежи од дожд.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk