Сметот на “Илинденска“ на приватен имот

Депонијата во објектот на улица “Илинденска„ е во приватна сопственост и газдите имаат обврска да ја исчистат.

Ова го тврдат од комуналната инспекција, кои објаснуваат дека тие уште во декември направиле пријава и го сликале местото, но сеуште не можат да го најдат сопственикот за да им го врачат решението.

Се работи за приватен имот каде што ние не смееме да влегуваме, бидејќи исклучиво го расчистуваме сметот од јавните  површини. За да влеземе во приватниот имот ние како прво треба да имаме податоци кој е сопственик на имотот, да воспоставиме контакт со луѓето, да им наложиме да го исчистат сметот. Се работи за фреквентна улица и смет има и на другата страна кон булевар “Трета МУБ“ и “Гоце Делчев“. Оваа постапка е во тек и ние со сигурност ова ќе го средиме, исчистиме и нема да има незадоволство од граѓаните - изјави Верче Лазаревска, раководител на сектор за инспекциски надзор во Општина Куманово.

Инспекторите констатирале дека сметот го фрлаат луѓето кои живеат и работат во близина на напуштениот објект.

Граѓаните се согласуваат дека е грда слика што изникнала депонија пред нивните згради, но се правдаа дека не знаат кој го фрла сметот на тоа место.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk