Советниците утре ќе одлучуваат за задолжување на Општина Куманово

Советниците утре ќе расправаат по предлогот на Општина Куманово за долгорочно задолжување за набавка на опрема за јавните претпријатија, откако минатата недела беше одржана јавна расправа.

Општина Куманово планира да подигне кредит во висина од 63.754.712 денари или 1 милион евра, кај Светската банка за обнова и развој со каматна стапка од 1 отсто, враќањето е 13 години, со грејс период од 3 години. Средствата ќе се искористат за набавка на: градежни машини, опрема и камиони за изнесување и депонирање на смет, опрема и камиони за зимско оддржување на сообраќајниците и специјално возило-пајак, за јавните претпријатија „Водовод“, „Чистота и Зеленило“, „Куманово-гас“ и „Куманово-паркинг“.

Предлагачот смета дека проектот ќе има големи придобивки на општината и четирите јавни претпријатија, а ќе генерира дополнителни приходи и заштеди на средства на јавните претријатија и нови услуги кон граѓаните. Поради моменталната финансиска состојба и стара и амортизирана механизација, претпријатијата трошат големи средства за нивно оддржување и трпат големи финансиски загуби.

- Со новата опрема претпријатијата ќе имаат капацитет да се ангажираат да извршуваат работи како што се изградба на водоводна и канализациона мрежа и зимското оддржување на улиците, наместо тоа да го вршат приватни фирми како досега,- го бранеа предлогот за задолжување од власта, наспроти обвинувањата на опозицијата дека времињата се тешки и општината може да заглави со овој кредит, како што тоа беше случај со предходниот на МЕАП.

 Апликацијата за овој преокт е поднесена во 2018 година, а во конкуренција на повеќе општини Куманово го добило проектот во висина од еден милион евра.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk