„Српски вез“ настапи на манифестации во Србија и Хрватска

Културно-уметничкото друштво „Српски вез“ од Куманово, на покана на Туристичка организација Топола, КУД „Опленац“ и КУД „Слога“ од Вуковар, викендов беше на турнеја во Србија и Хрватска. 

Детскиот ансанбл настапи на отворање на познатите 59 -тите „Опленачки берби“, една од најпосетените есенски манифестациии во Србија. Притоа фолклористите имале можност да се сретнат и поразговараат со претседателот на Србија, Александар Вучиќ, кој ја посетил Кралската винарија Караѓорѓевиќ на Опленец. 

„Претседателот Вучиќ во краткиот разговор со малите членови на „Српски вез“ уште еднаш искажа почитувањето и поддршката за се што „Српски вез“ го прави за промоција на културата и фолклорот во регионот и светот“, велат од КУД „Српски вез“.

Членовите на младинскиот ансамбл го посетиле и српското Собрание, а турнејата ја продолжиле во Вуковар Хрватска каде настапиле на Фестивалот за млади - Регионални средби на српските фолклорни друштва. 

Покрај „Српски вез“, настап имале и културно-уметнички друштва од Унгарија, Романија, Австрија, Хрватска, БиХ и Србија.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk