Ученици засадија 150 овошки во дворовите на училиштата во Умин Дол и Љубодраг

Учениците од ОУ „Карпош“ во Умин Дол спроведоа еко- акција за засадување на дрвца, со цел да создадат овошна градина.

 Засадени се 150 овошни садници, 85 од нив во дворот на училиштето во Умин Дол, а 65 во подрачното училиште во Љубодраг.

Дел од садниците се набавени со сопствени средства собрани од вработените и учениците, а дел се донација на невладината организација „Рурал Ума Сто“.

„Во соработка со училишниот одбор и советот на родители се договоривме сите заедно, па излезе дека секој поединечно засади по едно дрвце“, објасни директорот Мирослав Димевски.

Засадени се круши, сливи, јаболки, цреши, мушмули, дуњи- разновидно овошје, а видовите покриваат различни годишни времиња.

Во подготовка на теренот и другите активности се вклучило и месното население, кое најпрвин со механизација го култиувирале местото, подоцна делеле совети за засадување и закројување на дрвјата. Ветиле дека и понатаму ќе ги поддржуваат, особено во летниот период со акции за наводнување за да се обезбедат услови за опстанок и раст на овошките.

„Ветија дека и понатаму ќе помагаат, за да не биде попусто вложениот труд, а се надеваме дека за некоја година и ќе вроди со плод, нагласува Димевски.

Во рамките на акцијата создадено е и цветно катче во дворовите на училишните згради.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk