Унијата на медицински сестри го осудува нападот на нивната колешка во Куманово

Унијата на здруженија на медицински сестри, техничари, акушерки и стоматолошки сестри „ЗА НАС“ го осудува вчерашниот напад врз медицинската сестра на Инфективното одделение во Општата болница во Куманово.

Од таму велат дека ова е само уште еден случај во низата на немили настани кои се случуваат години наназад, а за кои тие постојано апелираат, бидејќи покрај сите проблеми со кои сестринството се соочува во својата професија, условите за безбедност мора да бидат на највисоко ниво.

„Не можеме да кажеме дека вакви несакани случувања нема да се повторат и во иднина. Затоа го потенцираме моментот дека треба да се пронајдат решенија, а не само јавно истакнување на проблемот.

Унијата смета дека е потребно да се води евиденција и да постои тек на постапка за ваквиот тип на немили настани. Да се задолжи Институтот за јавно здравје да понуди решение, кој патем имаше трудови за синдромот на согорување, стресот и безбедноста на работното место. Да се овозможат рехабилитации, продолжени годишни одмори и платени специјалистички прегледи.

Реакциите по основ на овие случувања не се доволни. Безбедноста на медицинските сестри на работното место е од круцијално значење за целиот здравствен систем”, истакнуваат од Унијата на ЗМСТАС.

 

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk