Во домашна изолација сите патници од автобусот со кои патуваа заразените од корона вирус

 Сите патници кои вчера пристигнале со автобусот од Италија, а патувале до Куманово, Скопје и Дебар, се идентификувани и ќе бидат во домашна изолација. Двајцата заразени сопружници од Дебар се префрлени на Инфективната клиника во Скопје.

- Сите сопатници се анкетирани и ќе им биде назначена домашна изолација и здравствен надзор. Еден од патниците е жител на Албанија, за идентитетот во текот на вчерашниот ден го известивме албанското Министерство за здравство, - изјави министерот Венко Филипче на денешната прес-конференција.

Министерот информира дека возачот во изминатите неколку денови повторно заминал на тура за Италија, а вчера било укажано дека денеска ќе да стигне во земјава.

- Пред половина час пристигна на граничниот премин Табановце. Автобусот ќе биде ставен на страна. Патниците ќе бидат ставени во една посебна просторија во сопственост и менаџирање на Царинската управа. Возачот ќе биде прегледан, ќе биде тестиран и што и како ќе се направи понатаму во однос на препораките на оваа нова тура патници ќе зависи од резултатот на анализата на тестот на возачот. Направен е целосен увид, веќе се започнати контактите. Дел се завршени интервјуата, дел ќе продолжат и во текот на денот на сите сопатници кои на 27 февруари влегле во земјава заедно со двајцата пациенти кои се сега хоспитализирани“, изјави министерот Филипче.

На денешната прес-конференција, беше речено дека целосно е спремен и објектот за изолација во Демир Капија, како дополнителен капацитет на инфективните одделенија во Штип, Велес и Гостивар.

- Тоа е објект којшто е нов, изграден од страна на Министерството за труд и социјална политика, целосно изолиран. Сметаме дека е добро место доколку се изнуди потреба за дополнителен број на луѓе коишто би биле во изолација, со цел да се олесни надзорот, како и работата на епидемиолозите, но и на припадниците на МВР. Како ќе се направи и во кој момент ќе зависи од моменталната ситуација доколку се изнуди потреба тоа се спроведе, - истакна министерот Филипче.

Тој аплираше до патниците кои се вратиле од странство да не одат на матичен лекар туку да се јават на телефонските броеви во центрите за јавно здравје.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk