Во изгорениот автобус нема повредени, на дел од патниците им се слошило па интервенирала Брза помош

 Седумдесет и двајца патници имало во двокатниот автобусот на новосадскиот превозник „Јадран“, што попладнево изгоре на граничниот премин Табановце.

Сите патници навреме излегле од автобусот и немало повредни, но поради шокот што го претрпеле на неколку патници им се слошило, па интервенирала Брзата помош од Куманово.

- Во пожарот немаше повредени патници, но како последица на предизвиканиот стрес интервениравме кај повеќе случаи, бидејќи им беше лошо. Луѓето беа прилично вознемирени и уплашени, со покачен крвен притисок.  Им пруживме прва помош, по што заминаа преку граница и рекоа дека ќе бараат помош во нивната земја, - соопштуваат од Брза помош Куманово.

Според непотврдени информации автобусот се враќал од Паралија, а како причина за пожарот се наведува неисправна инсталација.

Во противпожарната единица Куманово, пожарот бил пријавен во 15.45 часот, по што прво на терен излегло една возило, а потоа било побарано засилување. Пожарот е локализиран околу 18 часот.

Увид на лице место врши екипа на СВР Куманово.

По пожарот нема застој на граничниот премин Табановце и сообраќајот се одвива редовно.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk