Водата од градскиот водовод уште не е за пиење, се чекаат лабораториските резултати

Уште се чекаат лабораториските резултати за квалитет на водата и се препорачува водата во градскиот водовод  да не се користи за пиење, туку само за техничка употреба. Под техничка вода се подразбира вода за капење и одржување на личната хигиена, миење на садови, а за готвење таа треба да биде превриена.

Водоснабдувањето со техничката вода во Куманово е 80 отсто нормализирано, а интензивно се работи и останатите делови од градот дa добијат вода во најскоро можно време. Според проценките на надлежните до вечерните часови се очекува дека ќе биде во функција целата мрежа.

„Процесот се одвива бавно, водата се уште е заматена, но со голем пад во однос на вчерашните 10 илјади мерни единици, полека доаѓаме до вообичаените вредности. Се пушта по реони со внимателност за да не се јави некој дефект. За сега работата тече непречено, планираме до вечерните часови сите наши корисници да добијат техничка вода“, истакна директорот на Водовод Оливер Стојмановски.

Заради хемиска обработка- хлорирање на водата процесот тече поспоро од вообичаено, но мерките се преземени поради поголема безбедност за здравјето на граѓаните.

За потврда на квалитетот на водата правилата предвидуваат три последователни лабораторски резултати кои потврдуваат дека водата е бактериолошки исправна и чиста за конзумирање.

Високите зони на Општина Куманово-  населбата „Карпош“, дел од населба „Перо Чичо“ (Банево Трло) , „Ајдучка Чешма“, населбата „Иго Тричковиќ“ (Пуковско), резервоар кај улицата „Бајрам Шабани“, селото „Черкези’ и населбата „Железничка Станица“, се на мрежа која функционира засебно и кај нив не е забележан недостиг на вода во мрежата.

Куманово се соочи со проблеми во водоснабдувањето, откако Липковско беше зафатено со силно невреме проследено со пороен дожд и град, па големите количини на води кои се слеаа од планината ја заматија водата во браните.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk