Зачленете се во нашиот клуб на читатели и најновите текстови ќе ги добивате на вашата мејл адреса
Празничен базар со хуманитарен карактер беше организиран денеска во ООУ „Христијан Карпош“ во населбата Перо Чичо во Куманово, во пресрет на 11 Ноември-Денот на ослободување на Куманово. Базарот имаше продажен карактер на ракотворби создадени од учениците и наставниот кадар, а средствата се наменети за организацијата „Отворете ги прозорците“.
Во акцијата се вклучени сите одделенија од основното училиште, а изработени се сувенири, според возраста и можностите на децата.
„Главно се работи за пакувања за чоколади, магнети, моливчиња-сувенири посветени на Куманово кои се рачна изработка на нашите ученици, а работени под мотото „Куманово во срцето“, кои се продаваа по симболична цена. На ваков практичен начин сакавме да го одбележиме Денот на градот, но да дадеме и хуманитарна нота на настанот во соработка со организацијата „Отворете ги прозорците“, истакна Дејан Младеновски,професор по географија во училиштето.
Присутните можеа да го слушнат и училишниот хор како и да ја проследат ликовната изложба со дела од учениците кои се посветени на градот Куманово. На хуманитарниот базар учествува и учениците со посебни образовни потреби заедно со своите образовни асистенти.
Организатор на хуманитарниот базар е ООУ "Христијан Карпош" Куманово во рамки на проектот "Инклузија на ученици со посебни образовни потреби" поддржан од страна на Детската фондација "Песталоци" и Здружение за асистивна технологија "Отворете ги прозорците" Скопје. Целта е да се соберат средства за опремување на ресурсна соба во училиштето.
2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk