„За наше Куманово“ ќе учествува на следните парламентарни и претседателски избори

Како нов политички субјект ќе учествуваме на следните претседателски и парламентарни избори, без разлика дали ќе бидат редовни или предвремени, најави Максим Димитриевски во интервјуто за Дојче Веле.

Тој кажа дека веќе се формирани осум граѓански здруженија во државата по моделот на здружението „За наше Куманово“, а во следниот месец ќе бидат формирани уште неколку. 

„Ќе се позиционираме во политичкиот центар, со јасно нагласени државни, национални и патриотски визии, стратегија и политики со сериозни економски, образовни, здравствени проекти, како и проекти од други области кои ќе го подигнат стандардот и квалитет на живот на граѓаните. Предуслов за сето оваа е добро владеење, во чија основа е владеење на правото и правна држава“, вели Димитриевски.

Тој тврди дека во здружението се приклучуваат разочарани членови од двете најголеми партии, но и од помалите, и тоа без разлика на нивната верска и етничка припадност, како и граѓани кои досега немале никаква политичка активност, неопределени и голем број граѓани што не гласале никогаш досега.

„ Тоа ми дава за право да верувам дека ќе бидеме политичка сила која ќе биде важен фактор за формирањето на новата влада“, истакна Димитриевски.

2008 - 2025 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk